AMIR MAFTAH AFUNGUKA KUHUSU NYOSSO......

Amir Maftah, mchezaji wa zamani wa klabu za Simba na Yanga, ambaye amewahi kukumbana na tukio kama la John Bocco kutoka kwa Juma Nyosso

Baada ya Juma Nyosso kumfanyia vitendo vya udhalilishaji mchezaji wa Azam FC na timu ya Taifa John Bocco ‘Adebayor’, mchezaji wa zamani wa vilabu vya Simba na Yanga Amir Maftah amesema, hata yeye alishawahi kukumbana na kitendo kama hicho kutoka kwa Nyosso na kusema mchezaji huyo amezoea kwani tayari ameshafanya hivyo kwa wachezaji wengi.

“Unajua mpira unapochezwa uwanjani dakika 90 kuna mambo mengi sana yanatokea pamoja na maneno ambayo mashabiki hawawezi kuyasikia kwasababu wanakuwa mbali sana lakini uwanjani vinatokea vitu vingi sana na ukizingatia nchi yetu sasahivi bado haijawa kwenye teknolojia ya juu, kwasababu wenzetu hadi wakitaka kuongea wanaziba midomo, teknolojia yao ni kubwa wanaweza kunasa kila kitu”, ameeleza Maftah.

“Lakini kwa tukio ambalo limetokea kwa John Bocco nadhani lilitokea na kwa Maguli pia, hata mimi limewahi kunitokea tukio kama hilo, lakini mimi lilinitokea katika wakati ambao nilifanya ‘action’ yani baada ya tukio kutokea mimi nikafanya action hapohapo”.

“Nadhani yeye anajaribu kutumia staili hiyo ili kumtoa mchezaji mchezoni lakini haangalii anapofanya vile anakuwa amemvunjia heshima kuanzia mchezaji mwenyewe mpaka familia yake pia”.

“Mimi sikutaka sana kufatilia kisheria kwasababu alinifata Juma baada ya tukio lili yeye pamoja na Haruna kwa ajili ya kuniomba msamaha kutokana na tukio lile na nikaona atakuwa amejua makosa yake kama binadamu mimi nikaamua kumsamehe”.

“Mimi tukio lile liliniathiri sana kwenye malengo yangu ya mpira kwasababu tokea pale hata mtu ukiongea nane anasema huyu alimpiga mtu kichwa lakini hajui nini kilitokea kabla ya mimi kmpiga kichwa Juma”.

“Baada ya tukio la John Bocco kutokea liliniumiza sana natamani kama tukio langu lingeonekana kama lilivyoonekana la Bocco, navipongeza sana vyombo vya habari kwa kuona mambo yanayotokea uwanjani”.

“John Bocco na Juma Nyosso nadhani ni watu wanaoongea na tayari wameshawahi kukutana kwenye timu ya taifa, Juma anatakiwa amuombe msamaha Bocco na Bocco yeye mwenye ataamua afanye nini mimi sitaki kuingia sana huko maana wanatakiwa kuongea kwanza wao wawili”.