CAMEROON, IVORY COAST ZAKAMILISHA ORODHA YA TIMU ZILIZOFUZU CHAN.......

TIMU za Cameroon na Ivory Coast zimekamilisha orodha ya timu zitakazoshiriki michuano ya Mataifa ya Afrika kwa Wachezaji wa Ndani-CHAN itakayofanyika Rwanda baada ya kupata ushindi mwembamba katika mechi zao za mwishoni mwa wiki.

 

 Cameroon walifuzu kwa kupata ushindi wa bao 1-0 dhidi ya Congo huko Brazzaville baada ya kutoka sare ya bila kufungana katika mchezo wao wa mkondo wa kwanza uliochezwa wiki mbili zilizopita.

 

 Ivory Coast nao halikadhalika walipata ushindi wa bao 1-0 dhidi ya Ghana katika mchezo uliofanyika jijini Abdijan na kusonga mbele kwa bao la ugenini baada ya kuchapwa mabao 2-1 katika mchezo wa mkondo wa kwanza uliofanyika jijini Kumasi.

 

 Sasa timu hizo zinaungana na Angola, Jamhuri ya Kidemokrasia ya Congo, Ethiopia, Gabon, Guinea, Mali, Morocco, Niger, Nigeria, Tunisia, Uganda, Zambia na Zimbabwe ambazo zilikuwa tayari zimeshafuzu.

 

 Rwanda wao wamefuzu moja kwa moja kwa mwenyeji na kukamilisha orodha ya timu zitakazochuana katika michuano hiyo ambayo itaanza kutimua vumbi Januari16 na kumalizika Februari 7 mwaka huu.