VUGUVUGU LA USAJILI, YANGA YAIPIGA TENA BAO SIMBA KWA BUSUNGU

YANGA SC imeipa pigo lingine Simba SC, baada ya kufanikiwa kuinasa saini ya mshambuliaji Malimi Busungu wa Mgambo JKT ya Tanga.

Katibu wa Yanga SC, Dk Jonas Tiboroha amesema kwamba wamemalizana na Busungu. 

Dk Tiboroha amesema Busungu amesaini Mkataba wa miaka miwili leo kuhamia kikazi Yanga SC- maana yake Simba SC waliokuwa wanamuwania pia ‘imekula kwao’.

“Huyu kati ya wachezaji ambao walipendekezwa na benchi la Ufundi. Tumefanikiwa kumalizana naye leo hii,”amesema Tiboroha.  

Kumbuka kwamba Simba SC ilifanya mazungumzo na mshambuliaji huyo, lakini wakashindwana dau.

Busungu amekuwa mchezaji tegemeo wa Mgambo JKT kwa misimu mitatu na wiki hii aliitwa katika kikosi cha timu ya taifa ya Tanzania, Taifa Stars.

Busungu anakuwa mchezaji wa nne kusajiliwa Yanga SC ndani ya wiki moja na ushei, baada ya awali timu hiyo kuwasajili winga kipa Benedictor Tinocco wa Kagera Sugar, beki Mwinyi Hajji Mngwali wa KMKM na mshambuliaji Deusi Kaseke kutoka Mbeya City. 
CHANZO; BIN ZUBEIR