SAKATA LA DILUNGA BADO KIZUNGUMKUTI

KIUNGO Hassan Dilunga amegoma kuhudhuria mazoezi Yanga SC, kwa sababu ameambiwa atatolewa kwa mkopo Stand United.

Dilunga ameamua  kutokwenda mazoezini Yanga SC, huku uongozi wa klabu hiyo ukipanga kumchukulia hatua za kinidhamu.

Kutoka chanzo kimoja cha habari taarifa zinasema kwamba Dilunga  ameamua kususa mazoezi kwa sababu haoni sababu ya kufanya mazoezi na timu ambayo hataichezea.

“Amegoma kwa sababu wamemuambia watamtoa kwa mkopo, naye amesema haoni sababu ya kufanya mazoezi na timu ambayo hataichezea,”amesema rafiki  wa Dilunga.

Mwenyewe Dilunga alikua mkali alipotafutwa kuzungumzia hili swala na kusema hataki kuzungumza chochote kuhusu mambo yake na Yanga SC.

“Sitaki uandike chochote kutoka kwangu kuhusu mimi na Yanga SC, wewe iache kama ilivyo,”alisema jana Dilunga.

Yanga SC imeingia kambini jana katika hosteli za Chuo Cha Maaskofu, Kurasini mjini Dar es Salaam kujiandaa na michuano ya Klabu Bingwa Afrika Mashariki na Kati, Kombe la Kagame.