SCHWEINSTEIGER AKUBALI KUSAINI MIAKA MITATU MAN UNITED

KIUNGO Bastian Schweinsteiger amekubali kujiunga na Manchester United kwa Mkataba wa miaka mitatu, jambo ambalo ni habari njema kwa kocha Louis van Gaal.

Inafahamika kwamba uhusiano wa kiungo huyo wa Ujerumani na kocha Van Gaal umekuwa sababu kubwa ya kukubali ofa ya United, ambayo inaaminika atakuwa anapata mshahara wa Pauni Milioni 7.2 kwa mwaka katika miaka mitatu ambayo ni sawa na maslahi yake ya sasa ya Bayern Munich.

Kwa mujibu wa gazeti la kila siku la Ujerumani, BILD, mchezaji huyo mwenye umri wa miaka 30 amewaambia mabosi wa Bayern dhamira yake ya kuhamia United na yuko tayari kwenda Manchester kufanyiwa vipimo vya afya na kusaini makaratasi.