SERIKALI imezipiga marufuku timu za Simba na Yanga kutumia uwanja wa Taifa jijini Dar es Salaam kwa muda usiojulikana baada ya ghasia zilizojitokeza katika mchezo wao wa jana.




 
















Ghasia hizo ni pamoja na kuvunja mageti manne ya kuingilia uwanjani pamoja na viti 1781 vilivyoharibiwa na mashabiki wa Simba ambao hawakuridhishwa na maamuzi ya refarii Martin Saanya.

Waziri wa Habari Sanaa Utamaduni na Michezo Nape Nnauye alitembelea uwanja huo kushuhudia hasara iliyotokea ambapo alisema kuwa kutokana na vurugu hizo Serikali imeamua kuzifungia timu hizo kwa muda usiojulikana kutumia uwanja.



"Tumezifungia Simba na Yanga kutumia uwanja wa Taifa kwa muda usiojulikana kutokana na vurugu zilizojitokeza ili iwe fundisho," alisema Nape.

Waziri huyo pia alisema mapato ya mchezo huo hayatagawanywa kwa klabu hizo hadi itakapofahamika ni kiasi gani kinahitajika kukarabati miundombinu ya uwanja huo na endapo fedha hizo hazitatosha basi italazimika timu hizo kuongeza ili kufidia.

Aidha Waziri Nape alisema kutafungwa kamera maalum kwa ajili ya kuonesha mashabiki wote walioingia uwanjani hapo ili kuwashughulikia wale watakaofanya vurugu za aina yoyote.

Wakati huo huo Nape alisema mfumo wa tiketi za Kielektroniki ulifanikiwa kwa kiasi kikubwa baada ya kuingiza mashabiki 43,000 idadi ambayo ni kubwa huku ikiwa ndiyo mara ya kwanza kutumika tena katika mechi kubwa.

Katika mchezo huo miamba hiyo ilitoka sare ya kufungana bao 1-1 huku ikishuhudiwa Simba wakicheza pungufu baada ya nahodha Jonas Mkude kulimwa kadi nyekundu.

WAKATI HUO;

SIMBA SC WAOMBA RADHI, WALIA NA WAZIRI MWIGULU NCHEMBA

 

"Kwa masikitiko makubwa klabu ya Simba imesikitishwa sana na vitendo vilivyofanywa na baadhi ya washabiki wetu,cha kuvunja sehemu ya viti vya Uwanja wa Taifa.kitendo kilichotokea jana kwenye mchezo wetu wa Ligi kuu dhidi ya Timu ya Yanga.

 
Tungependa kuomba radhi kwa kadhia hii na klabu imekubali kulipia gharama za uharibifu huu.
Klabu itazungumza na wamiliki wa Uwanja huu kuona inalipaje gharama hizo.

 

 
Ni mategemeo yeti kuona jambo hili halitajikoze tena.
Lakini mbali na hayo klabu kesho Jumatatu itawasilisha malalamiko rasmi juu ya uchezeshaji mbovu wa waamuzi wa mchezo wa jana,hususan Mwamuzi wa kati Martin Sanya.

Sisi tunaamini vitendo viovu vilivyofanywa na washabiki wetu vilisababishwa na uamuzi wa hovyo kupita kiasi uliosababishwa na waamuzi hao.

 
Haieleweki ni kigezo gani mwamuzi huyo alitumia kulikubali goli la 'mpira wa pete'la mshambuliaji wa Yanga Amisi Tambwe na kulikataa goli halali la mshambuliaji wetu Ibrahim Ajibu.

 
Pia tumeshangazwa na kitendo cha kumpa kadi nyekundu nahodha wetu Jonas Mkude.ilhali kama nahodha alimfata kwenda kumlalamikia kitendo chake cha kukubali goli la 'hovyo 'la Tambwe.

 
Sote tumeona Sanya alijikwaa wakati anarudi nyuma na kuanguka,kisha kuanguka na kutoa kadi nyekundu kwa Mkude.

 
Kimsingi huyu mwamuzi ana historia ovu ya kuwabeba Yanga.

 
Hakuna asiyesahau msimu uliopita kwenye kombe la Shirikisho,Yanga walipocheza na Coastal Union kule Mkwakwani Tanga.nini kilitokea!

 
Tunajua safari hii Tff na bodi ya Ligi zitatoa adhabu kali kwa waamuzi hawa ili iwe fundisho kwa maamuzi ya hovyo ya aina hii.

 
Pia klabu italalamika kitendo cha vyumba vyetu vya kubadilishia nguo(dressing room)kupuliziwa dawa zilizokuwa na nia ya kuwaathiri wachezaji wetu kabla ya mechi kuanza.

 
Tutaziomba mamlaka zifanye uchunguzi wa kina kubaini kitendo hiki kisicho cha kiungwana kinachosadikiwa kufanywa na wapinzani wetu.

 
Tunajua dhamira yao ni kuwafanya wachezaji wetu wachoke,lakini timu yetu ya Matabibu ilichukua hatua sahihi za kuwafanya wachezaji wetu waweze kumaliza dakika Tisini za mchezo kwa uwezo na weledi mkubwa.

 
Na mwisho klabu itoe malalamiko yake kwa Waziri wa mambo ya nchi,Mh Mwigulu Nchemba.

 
Waziri huyu bila shaka amesahau majukumu yake yake ya kazi na kugeuka kiongozi wa klabu ya Yanga.

 
Tunajua ni haki yake kuwa na mapenzi kwa klabu aliyoichagua.lakini vitendo vyake anavyovifanya vinaacha maswali mengi kuliko majibu.ukizingatia nafasi yake kama Waziri mwenye dhamana ya kuongoza Wizara nyeti.

 
Itakumbukwa majuzi waziri huyu alifanya ziara Mkoani Morogoro kuzungumza na vikosi anavyoviongoza.

 
Na inajulikana pia Refarii wa mchezo wa jana Martin Sanya ni mwajiriwa wa Jeshi la Magereza mkoani Morogoro
Sote tulishuhudia Jana Mwigulu alishangilia goli la hovyo la mwajiriwa wake Sanya.

 
Pia waziri huyu alitoa kauli tata kuwa angetamani siku moja klabu inayoshangilia wapinzani wa Yanga wakipigwa mabomu ya machozi na Askari wa jeshi la Polisi.

 
Kauli hii aliitoa wakati wa sherehe za kukabidhi zawadi kwa timu zilizoshinda msimu uliopita zilizoandaliwa na wadhamini wa ligi.kampuni ya Vodacom.

 
Tunajiuliza yale mabomu ya jana pale Uwanja wa Taifa ndio utekelezaji wa maagizo ya boss Mwigulu?

 
Lakini pia matumizi ya rasilimali za umma yakiwemo magari ya serikali ktk shughuli za mara kwa mara za klabu ya Yanga napo kunaacha maswali mengi mno.

 
Wanasimba wanauliza kila Waziri anayeshabikia Simba akiwepo Waziri Mkuu akifanya vitendo hivi kutakuwa na utawala gani serikalini?

 
Imani yetu viongozi wakuu wa nchi watamuonya mh Mwigulu,vingenevyo atatengeneza chuki baina ya washabiki wa Simba dhidi ya serikali yao.

 
Mwigulu atambue klabu ya Simba ina mamilioni ya washabiki kama ilivyo klabu yake anayoishabikia.
Hatutarajii kuona 'mahaba'yake yasio na staha yanachochea jambo ovu kwa wanasimba na serikali yao wanayoiamini na kuipenda sana,".

 
(Imetolewa na Mkuu wa Idara ya Habari na Mawasiliano ya Simba SC, Hajji Sunday Manara)

                                            STORI YA PILI;

KOCHA mkuu wa Mwadui FC amesema atajiuzulu kufundisha soka muda wowote kuanzia sasa kwavile amechoshwa na maamuzi mabovu ya marefarii wa hapa nchini.

Akizungumza kwa hasira baada ya kumalizika kwa mchezo ambao timu yake ilipigwa bao 1-0 na Mbeya City kwenye dimba la Sokoine jijini Mbeya, Julio alisema haoni sababu ya kuendelea kufundisha wakati tayari waamuzi wana matokeo yao.

"Natumia nguvu nyingi kufundisha, kampuni inatumia pesa nyingi kugharamia timu, tunasafiri safari ndefu halafu mwisho wa siku waamuzi wanafanya upendeleo wa waxiwazi.

"Nimeshachoka, nawatazama tu sasa na uamuzi wangu ni kuacha kufundisha mpira, na hii yaweza kuwa mechi yangu ya mwisho kuwa kocha," alisema Julio.

Bao pekee katika mchezo huo liliwekwa nyavuni na Ditram Nchimbi 'Ditinho' aliyeachia shuti kali lililomshinda kipa Shaban Kado na kutinga wavuni.

Mbeya City walitawala mchezo kwa kiasi kikubwa na kuwapoteza Mwadui ambao hawakuonyesha kandanda safi kama ilivyotarajiwa na wengi.