VPL; BAADA YA KUMALIZA MGOMO, YANGA WAGAWANA POINTI NA AFRICAN LYON

Mabingwa wa soka Tanzania bara Dar es salaam  Yanga African wamelazimishwa sare ya bao moja dhidi ya African Lyon mchezo uliofanyika kwenye uwanja wa Uhuru na kushindwa kuishusha Simba kileleni.
Matokeo hayo yanaifanya Yanga iendelee kukamata nafasi ya pili kwa pointi zake 37 baada ya kucheza mechi 17 sawa na Simba iliyo kileleni kwa pointi zake 38.  Simba inaweza kuongeza gepu la pointi hadi nne iwapo itashinda dhidi ya JKT Ruvu leo Uwanja wa Uhuru. 
  Hadi mapumziko hakuna timu iliyofanikiwa kupata bao na African Lyon walicheza kwa kujihami zaidi kipindi cha kwanza wakifanya mashambulizi ya kushitukiza

  Mchezo huo ulikuwa wa taratibu ambapo dakika 45 za kipindi cha kwanza hakukuwa na shambulizi lolote la hatari kwa pande zote mbili licha ya Yanga kumiliki sehemu kubwa ya mchezo.
Mlinda mlango wa Yanga Deogratius Munishi 'Dida' kwa muda mrefu wa kipindi hicho alikuwa likizo kutokana na kukosekana kwa kashkashi baada  ya Lyon kucheza zaidi nyuma na katikati ya uwanja.

Ludovic Venance aliipatia Lyon bao dakika ya 58 baada ya kupokea pasi ya Abdallah Mguhi ambaye alikuwa mwiba mkali upande wa kushoto ambao Haji Mwinyi alishindwa kabisa kumdhibiti.

Tambwe aliisawazishia Yanga kwa kichwa dakika ya 74 baada ya kumalizia krosi ya beki Juma Abdul kutokana na Lyon kushindwa kuokoa mpira ambao ulionekana hauna madhara.

Lyon iliwatoa Awadh Juma, Omari Abdallah na Thomas Morice na kuwaingiza Ludovic, Peter Mwalyanzi pamoja na Cosmas Lewis. Yanga iliwapumzisha Thaban Kamusoko, Mwinyi na Deus Kaseke na kuwaingiza Gofrey Mwashiuya, Emanuel Martin na Obrey Chirwa.

Yanga imefikisha pointi 37 alama moja nyuma ya Simba ambao kesho watacheza na JKT Ruvu na endapo watashinda wataongeza 'gepu' la pointi kufikia nne.

Kikosi cha African Lyon kilikuwa; Youthe Jehu, Baraka Jaffary, Miraji Adam, Halfan Twenye, Hamad Wazir, Hamad Manzi, Hassan Isihaka,Omary Abdallah/Peter Mwalyanzi dk80, Awadhi Juma/ Ludovic Venance dk46, Thomas Maurice/Cossmas Lewis dk82. na Abdallah Mguhi.
 
Yajnga SC; Deogratias Munishi ‘Dida’, Juma Abdul, Haruna Niyonzima, Mwinyi Hajji Mngwali/ Geoffrey Mwashiuya dk74, Kelvin Yondan, Vincent Bossou, Simon Msuva, Thabani Kamusoko/ Obren Chirwa dk56, Amissi Tambwe, Said Juma na Deus Kaseke/ Emanuel Martin dk65.