LOUIS VAN GAAL KUTAMBULISHWA RASMI ALHAMISI!

MANCHESTER UNITED imetangaza kuwa Tiketi zote 55,000 za kuingia kwenye Mechi Uwanjani Old Trafford kwa Msimu mzima zimeuzwa na hii imevunja Rekodi ya Tiketi za Msimu kumalizika mapema.

Wachambuzi wanadai kuuzwa huko kwa Tiketi hizo haraka tangu Old Trafford ilipopanuliwa na kuwa ya Viti 76,000 Mwaka 2006 kumekuja hasa kutokana na shauku ya Mashabiki baada ya Meneja wao mpya Louis van Gaal kufanya vizuri huko Brazil akiwa na Netherlands na kuifikisha Nusu Fainali ya Kombe la Dunia.

Baada kuuzwa Tiketi hizo 55,000 Tiketi zilizobaki 21,000 huwekwa pembeni kwa makusudi na rasmi kwa ajili ya Mashabiki wa Timu za Ugenini na kwa Mashabiki wanaotaka kuhudhuria baadhi ya Mechi na si Mechi zote za Msimu wote.

Watu wengi walihofia kuwa baada ya Man United kufanya vibaya Msimu uliopita chini ya David Moyes na kumaliza Ligi wakiwa Nafasi ya 7 na hivyo kukosa kabisa kucheza Mashindano ya Klabu Ulaya kungeweza kuathiri mahudhurio ya Watazamaji Old Trafford.

Lakini hali imekuwa tofauti hasa baada ya kumtangaza Louis van Gaal Meneja mpya ambae anatarajiwa kutambulishwa rasmi huko Old Trafford Alhamisi kabla Ijumaa kuruka kwenda Marekani kwa Ziara Kabla Msimu Mpya Kuanza.

Hivi sasa Kikosi cha Man United, bila ya Wachezaji walioshiriki Kombe la Dunia huko Brazil na Nchi zao, kimeanza Mazoezi chini ya Ryan Giggs huko Jijini Manchester kwenye Kituo chao cha Mazoezi cha AON Training Complex.

Man United wataruka hapo Ijumaa Julai 18 kuelekea huko Marekani na kupiga Kambi huko California kabla ya kucheza Mechi yao ya Kwanza huko USA hapo Julai 23 dhidi ya LA Galaxy kugombea Chevrolet Cup ndani ya Rose Bowl, Pasadena.

USA-ZIARA YA KABLA MSIMU MPYA:

[Zote Nchini Marekani]

Manchester United v LA Galaxy

Chevrolet FC Cup

Jumatano 23 Julai 2014, Rose Bowl, Pasadena

Manchester United v AS Roma

International Champions Cup

Jumamosi 26 Julai 2014, Sports Authority Field, Denver

Manchester United v Inter Milan

International Champions Cup

Jumanne 29 Julai 2014, FedEx Field, Washington DC

Manchester United v Real Madrid

International Champions Cup

Jumamosi 2 Agosti 2014, Michigan Stadium, Ann Arbor