Mchezaji wa zamani wa Simba Dua Said akamatwa tuhuma wizi wa maji

Mchezaji wa zamani wa Simba Dua Said akamatwa tuhuma wizi wa maji

Naibu Waziri wa Maji, Amos Makalla (kulia), akimhoji mchezaji wa zamani wa Simba, Dua Said ambaye alikuwa miongoni mwa watu watano waliokamatwa kwa tuhuma za kujiunganishia maji isivyo halali kutoka kwenye mabomba ya Mamlaka ya Maji Safi na Taka (Dawasa), kwenye nyumba zao zilizopo Bonde la Mto Msimbazi, Kigogo, Dar es Salaam. Makalla alikuwa kwenye ziara ya kukagua miradi ya maji Dar es Salaam. (picha na Kamanda wa Matukio)

Mchezaji wa zamani wa timu ya Simba na Taifa Stars, Dua Said, anashikiliwa na jeshi la Polisi mkoa wa Kinondoni kwa tuhuma za kuiibia maji kampuni ya Maji Safi (Dawasco).

Mchezaji huyo alikamatwa jana wakati wa ziara ya Naibu Waziri wa Maji, Amos Makala, aliyeongozana na wabunge wa Chadema, John Mnyika, Halima Mdee na Suzan Lymo katika operesheni ya dharura ya kuwasaka wezi wa maji katika wilaya ya Kinondoni.

Hata hivyo, mbunge wa Kinondoni, Idd Azan ambaye eneo lake ndilo walilokamatwa watuhumiwa hao, hakuwapo katika ziara hiyo.

Mbali na Dua Said, pia nyumba ya mchezaji wa zamani Nico Bambaga, ambaye kwa sasa ni marehemu ilikutwa imeunganishwa katika mtandao huo wa wizi wa maji sambamba na nyumba zingine tatu.

Akizungumza baada ya kukamatwa, Dua alisema nyumba iliyokutwa imeunganishwa na mfumo huo wa maji katika eneo la Kigogo ni mali yake na kwamba kwa sasa hakai hapo baada ya kuhamia Kinyerezi.

Alisema kuwa kabla ya kuondoka Kigogo alikuwa ni miongoni mwa wajumbe wa kamati ya maji waliokuwa wakipambana na mfumo wa wizi wa maji na kwamba yeye hauzi maji bali anapeleka kwenye nyumba yake nyingine.

"Niliomba kuunganishiwa maji kihalali na sikuyapata mpaka ninaondoka Kigogo ndiyo maana jana nilipoambiwa nije kuna tatizo sikusita kuja," alisema Dua.

Akizungumza baada ya kuwakamata watuhumiwa hao, Makala alidai kuwa Dua alikuwa akivuna maji kiasi cha lita 90,000.

"Moja ya vitu vinavyochangia tatizo la maji ni hili la wizi wa maji, watu hawa kwa ujanja wao wameikosesha serikali mapato pamoja na kuwafanya wananchi wengi wakose maji, lazima wachukuliwe hatua stahiki," alisema.

Jiji la Dar es Salaam na maeneo mengine mengi ya Tanzania yamekuwa katika tatizo sugu la huduma ya maji kwani huduma inayotolewa hailingani na mahitaji.