SIMBA MWENDO MDUNDO, WAKWEPA ROBA YA MBAO, MZAMIRU SHUJAA

Vinara Simba wameepuka kigingi kigumu kwenye uwanja wa Uhuru baada ya kuibuka na ushindi mwembamba wa dakika za mwisho dhidi ya Mbao katika mchezo wa Ligi Kuu Tanzania Bara.

Kipa wa Mbao Emmanuel Mseja aliokoa michomo kadhaa iliyokuwa ikielekea wavuni ambapo dakika ya 14 alipangua shuti la Laudit Mavugo kabla ya kuokoa michomo mingine dakika za 24 na 32

Kuingia kwa mshambuliaji Fredrick Blagnon kuliongeza nguvu katika safu ya ushambuliaji ya Simba lakini bado walinzi wa Mbao walikuwa makini kuhakikisha nyavu zao hazitikiswi kwa namna yoyote.

Kiungo Muzamiru Yassin aliifungia Simba bao la ushindi dakika ya 86 baada ya kupokea pasi safi ya kichwa toka kwa Blagnon na kuingia ndani ya eneo la hatari akiwa peke yake bila upinzani wowote kutoka kwa Wachezaji wa Mbao na kuuweka mpira nyavuni.

Simba iliwatoa Mavugo na Ibrahim Ajib nafasi zao zikachukuliwa na Blagnon pamoja na Mohamed Ibrahim huku Mbao ikiwatoa mkongwe Hussein Swedi na Pius Buswita na kuwaingiza Boniface Maganga na Frenk Damas.

Kwa matokeo hayo Simba inafikisha pointi 26 na kuendelea kujitanua kileleni kwa tofauti ya pointi 6. 

Kikosi cha Simba: Vincent Angban, Janvier Bokungu, Mohamed Hussein, Murshid Juuko, Jonas Mkude, Method Mwanjale, Shiza Ramadhani, Mzamiru Yassin, Laudit Mavugo, Ibrahim Hajib, Mwinyi Kazimoto.

Mbao: Emmanuel Mseja, Steve Mganya, Steve Kigoha, Asante Kwasi, Pius Buswita, Youssouf Ndikumana, Robert Magadula, Salmin Hoza, Emmanuel Mvuyekure, Hussein Swedy, Dickson Ambundo